Noticias FGA
Ourense despide un Campionato de España de "10" no organizativo
Corenta e catro anos despois de que no ano 1974 se disputaran os últimos Campionatos de España de pista cuberta na nosa comunidade, Ourense e toda Galicia viviría a gran festa do que foi o XLV Campionato de España Sub-20 Masculino e o XL Campionato de España Sub-20 Feminino que porían a nosa comunidade no centro de atención a nivel nacional durante este pasado fin de semana.
Segundo Isidoro Hornillos, “Podémonos sentir tremendamente orgullosos da capacidade de traballo amosada por todos e cada un dos que tomaron parte neste gran proxecto, dende os voluntarios ata montadores, pasando por personal técnico, loxístico e organizativo(…) a todos e cada un deles as máis sinceras felicitacións” desta maneira se expresaba o presidente da FGA e responsable do Comité Executivo sobre o campionato, do quen non agochaba a súa satisfacción polo decorrer do mesmo.
Se no plano organizativo todo foron parabéns, non menos importante sería o plano deportivo na que os galegos acadarían unha medalla de prata e sete postos de finalistas.
Por sectores e comezando polos 60 m. Daniel Armada do Vila de Candas con 7.22 e Javier Mañanado Coruña Comarca con 7.26 non poderían acceder as semifinais nunha proba con bastante nivel na que si en cambio Santi Represas do C.A. Sada chegaría ás semifinais quedando 5º na súa serie con 7.14. Na categoría feminina Adiaratou Cámara do Lucus sería sétima na súa rolda con 8.05. sendo sexta Lucía Ferrer da Gimnástica -tamén en roldas- con 8.04. Nos 200 m. tanto Andrea Pais do A.F. Celta como Claudia Torres accederían á final B dos 200 m. ocupando un excelente 4ª posto a céltica con 25.31 (MMP) e un oitavo a ferrolana con 25.87 (con MMP nas roldas clasificatorias con 25.63).
Nos 800 m. moi bo campionato para o atleta coruñés do Comarca Elian Nuna quen se metería na final da súa proba rematando de quinto con 1:54.07 e establecendo unha MMP. Sería nesta mesma proba, pero na categoría feminina, onde se conseguiría a única medalla dos nosos atletas a cargo dunha motivadísima Raquel Meaños quen malia ter baixado este ano de 2:08, nada poido facer ante a catalana María Lasa colleitando a prata con 2:09.38.
Na final dos 1500 m. non habería presenza galega xa que tanto a celeste Lucía Cardesín con 4:59.85,María Pérez do Comesaña con 5:15.98; Roi Estévez do C.A. Santiago con 4:24.16 e Jorge Sieira do Coruña Comarca con 4:12.08 non conseguirían chegar ata a final.
No sector dos valados moi bo papel do Lucense do Lucus Santiago Rozas que chegaría ata a final acadando un magnifico sétimo lugar e establecendo un mellor rexistro na rolda clasificatoria de 8.26 acadando unha MMP. Nas mulleres a gimnástica Lucía Ferrer con 9.36 nesta mesma especialidade quedaría as portas da final con 9.36.
Xa nos concursos décimo posto en triplo para Alexandre Barreiro con 14.00 m. e noveno para Saray Amoedo do Vila de Cangas con 11.02 m. En peso novena posición para Andrea González da Gimnástica con 11.05 m. ocupando posto de finalista na sexta posición, o lanzador do Riazor Coruña Jaime Arias cun mellor lanzamento de 14.78 m. no seu último intento.
Por último bo papel de Eva Queimaño do A.F. Celta quen tomaría parte no concurso de altura no que sería 14ª con 1.54 m. Esta mesma atleta, que xa sería internacional nas combinadas, tomaría parte no Péntatlon na que a piques estivo de colleitar o bronce quedando a tan só 80 puntos da medalla. Ó remate cuarta posición con 3.364 puntos
A nivel xeral do resto de participantes, salientar que o campionato viviría a consecución de catro récords nacionais a cargo de Pol Retamal do F.C.Barcelona nos 200 m. (por dúas veces) deixandoo en 20.99, de Alfredo Jiménez da A.D. Marathon con 47.38 así como de Sara Gallego con 54.09 do ISS – L´Hospitalet nos 400 m.
