PRENSA

Chema Martínez e Paula Mayobre vencen na 28º Carreira de San Xosé en As Pontes

Podio da San Xosé masculina – Xosé Ferreiro

Podio da San Xosé feminina – Xosé Ferreiro

(Xosé Ferreiro) Este domingo 18, nunha mañá moi chuviosa, disputouse na Carballaeira da Fraga a tradicional Carreira de San Xosé pontesa, que xa vai pola súa 28ª edición.

Organizada polo Atletismo Olympo e o Concello pontés, co patrocinio de Matojoma e Eroski Center, disputáronse varias carreiras, dende os máis pequenos, ata os máis maiores, incluida a habitual andaina.

Pero a edición deste ano non se reduciu á carreira en si, xa que o sábado tivo un gran prolegómeno, e os máis pequenos e adultos do Clube Atletismo Olympo puideron adestrar con Chema Martínez, quen ademais deu unha charla no local do Lar, nun evento que durou dúas horas.

Cabe recordar que o atleta madrileño fora Campión de Europa de 10.000 metros en Munich 2002, quedando por diante de Dieter Baumann e Jose Ríos, ademáis de subcampión de Europa de Maratón en Barcelona 2010 e tamén de 10.000 metros en Goteborg 2006.

Xa o domingo á mañá se disputaron todas as carreiras, e como non, a absoluta masculina levouna Chema Martínez (Las Rozas), seguido de Jonathan Fernández (Pasa ou Entorna), e Marcelo Vásquez (Ferrol).

Na proba feminina foi a gran Paula Mayobre (Seoane Pampín) a gañadora, seguida da non menos grande Melina Alonso (Fene), e terceira quedou Zelin Spencer (Vilalba).

Nos Veteranos o vencedor foi Jose Rey (Paula Mayobre), seguido do local Manuel López e Xesús López (Pasa ou entorna). A gañadora feminina foi Silvia Sánachez (Coruña). Destacar que nunha proba tan dura chegaron á meta incluso participantes de ata 78 anos.

Na competición xuvenil gañou Aldo Rey (Cabanas), seguido de Azziz Saidi e Samuel Dopico, ambos do Ría Ferrol. O podio feminino foi netamente local con Cristina Souto, Laura Bellas e María Prieto.

Na proba cadete tamén coparon o podio masculino os atletas locais, con Hugo Blanco, Antón García e Mario Torrente, mentres que nas rapazas gañou Ana Vallines (Lourenzá), acompañada polas locatarias Celia Durán e Irene García.

Na proba alevín houbo outro pleno pontés e do Olympo con Destaw Pellón, Mateo Núñez e Antonio Graña, mentres que nas cativas venceu Alba Pena (Narón), por diante de Irene Paz (Paula Mayobre), e a locataria Laura Vispalia.

Por último, gañou a proba benxamín o pontés Xandre Domínguez, seguido de Pablo Moreda (Cedeira) e Leandro Lopes (Vilalba). Noa Ardao (Narón) foi a gañadora feminina.

Tamén se deu premio ó 28º clasificado, en homenaxe á idéntica edición da disputa desta proba, que foi para Alberto Chamorro. Curiosamente non se puido outorgar este premio na categoría feminina dado que participaron 27 mulleres. O equipo con máis participantes foi o do Barqueiro, con 18 integrantes.

Sorteouse unha camisola e un libro asinados por Chema Martínez, e tamén se recadaron preto de mil euros, para a Asociación Ve La Luz, contra o maltrato infantil e á muller.

No evento amenizado por Xalo Maira, entregaron as diversas medallas, os concelleiros Chicho Tembrás e Isa Fornos, a presidenta do Olympo, Susana Castro, e o propio Chema Martínez.

• .Imprimir esta noticia